Türkmenistanyň Medeniýet ministrliginiň Şekillendiriş sungaty sergi merkezinde Medeniýet we sungat işgärleriniň hem-de Magtymguly Pyragynyň şygryýet güni mynasybetli türkmen suratkeşleriniň we ýazyjylarynyň eserleriniň sergi-bäsleşigi açyldy. Sergini Türkmenistanyň Medeniýet ministrligi Kärdeşler arkalaşyklarynyň Milli merkezi we «Edebiýat we sungat» gazetiniň redaksiýasy bilen bilelikde gurady.
Sergide şekillendiriş sungatynyň dürli ugurlary boýunça – žiwopis, heýkeltaraşlyk, keramika, zergärçilik işleriniň 130-sy bäsleşige hödürlendi. Tematika babatda medeniýet we sungat işgärlerine bagyşlanan eserler agdyklyk edýär. Olaryň arasynda «Magtymguly Pyragy döredijilik pursatynda» atly altyn çaýylan heýkeli (Gullyussa Kulyýewiň), Sahy Jepbarowyň (heýkeltaraş Maksat Bazarow) bürünç döşheýkeli, Gurbannazar Ezizowyň (heýkeltaraş Güljahan Şöhratgeldiýewa) döşheýkeli bar.
Bu ýere gelenler olara içgin syn edip, işlere gowy baha berdiler. Hemişe bolşy ýaly, keramikaçy Dilber Umarowanyň heýkeljikleri «Keramika» toparlaýyn sergide nepisligi bilen özüne çekdi. Türkmenistanyň halk artisti Öwez Gelenowyň Otellonyň (suratkeş Anna Annaýew) keşbindäki portreti özboluşlulygy bilen tomaşaçylary öz ýanynda egledi.
Nakgaş Begenç Berkeliýew, heýkeltaraş Çarymyrat Amanow, zergär Aýjemal Çaryýewa birinji orny eýeläp, bäsleşikde ýeňiş gazandylar. Baş baýrak Türkmenistanyň halk suratkeşi Annadurdy Almammedowyň «Aýdere» eserine berildi.
Türkmenistanyň Döwlet çeperçilik akademiýasynyň bäşinji ýyl talyby Mahym Atakowa Hormat haty we gymmat bahaly sowgat bilen sylaglanyldy.
– Meniň üçin 2025-nji ýyl şowly ýyl boldy – diýip, M.Atakowa gürrüň berýär. – 65 ýurtdan suratkeşleriň gatnaşmagynda Moskwada geçirilen halkara sergisine hödürlenen 1000 eserden «Süýji düýş» suratym iň gowularyň hataryna girdi.
Surat habarçysy Ýusup Türşekow Mahym Atakowany «Süýji düýş» suratynyň ýanynda surata düşürdi. M.Atakowa Türkmenistanyň Döwlet çeperçilik akademiýasynyň ýanyndaky Türkmen döwlet ýörite çeperçilik mekdebini stanok žiwopisi ugry boýunça tamamlady, indi welin akademiýada kitap grafikasyny öwrenýär. Mahym çeper eseriň surat bezeginde kitaby wakalary edil kino ýaly göz öňüne getirip okamalydygyny, onsoň has täsirli pursatlaryň surata geçirmelidigini aýdýar. Şunda suratkeş biraz taryhçy hem etnograf bolmaly.
Keramikaçy Bagtyýar Hojanyýazow bu gün sergi merkeziniň täsirli gahrymanlarynyň biri boldy. Telewideniýe işgärleri onuň bilen söhbetdeş boldular, dostlary, eserleriniň muşdaklary we kärdeşleri ony gutlaýardylar. Şu ýyl Bagtyýar A.S.Puşkiniň mozaika portreti üçin Russiýa Çeperçilik akademiýasynyň Hormat haty bilen sylaglandy. Bagtyýar Hojanyýazow Köneürgençde gadymy keramikany dikeltmek bilen meşgullanýar. Daşoguzda we Köneürgençde onuň ýolbaşçylygynda hususy keramika mekdepleri hereket edýär. Ol öý muzeýleriniň ikisini döretdi. Türkmen halkynyň milli medeniýetinde bitiren hyzmatlary üçin oňa «Türkmenistanyň at gazanan medeniýet işgäri» diýlen hormatly at berildi. Bagtyýaryň tapawutlandyryş nyşanlary kän, bu gün ähli sylagy nakgaşyň döşüni bezedi.
Sergi duşuşyklar, gutlaglar, tanyşlyklar we ýadygärlik fotosuratlar bilen uzak wagt ýatda galar. Sergi öz işini dowam etdirýär.
